جزيزرة سيشل الخيالية 2025 ، صور جزيرة سيشل 2025

اول شي الباكيج من الامارات للعطلات ويشمل التالي ( تذكرتين على طيران الامارات اكنومي + 5 ايام في منتجع الفور سيسزن فيلا مع حمام سباحه خاص + المواصلات بسياره خاص - بي ام دبليو - من المطار للمنتجع والعكس + فل بورد ( افطار + غذدا او عشا ) + رحله بحريه ) = ؟؟؟؟ درهم

قبل ما انطلق لمطار دبي فكرت احجز في فندق انتركونتننتال فستفال ستي وانصح فيه وايد لانه اول شي سعره معقول ( جناح فخم كامل ب ؟؟؟؟ درهم ) + شي مول حذالك + المارينا + قريب من المطار تقريبا 10 - 15 دقيقه .. طبعا عشان نريح لاننا يايين من بوظبي لدبي واحسن نريح شوي عشان المسافه شوي طويله فالطياره ..

الانطلاق من مطار دبي الدولي وطيارتنا كانت الساعه 2 الصبح تقريبا
ملاحظه هامه ( الرجعه تكون الساعه 1 فالليل تقريبا عشان جي انصحكم بحجز يوم كامل قبل رحلة العوده عشان تريحيون وللعلم مده الطيران تقارب ال 6 ساعات )

واحب اذكر انه سيشل فيها جزيرتين مهمتين واللي هني جزيره ماهي وفيها مطار ماهي والعاصمه فكتوريا + جزيره برالين ( وبصراحه ما رحناها لانه طياراتهم الداخليه ما تشجع والمسافه بالقارب ساعه او اكثر ومافي داعي لها )
معلومه مهمه ثانيه ( معظم المحلات والخ تغلق الساعه 7 المسا او قبل )
معلومه مهمه .. ( الدوله مسيحيه عشان جي قبل ما تاكلون اسألو اذا الاكل حلال لانه شي مطاعم للمسلمين )
معلومه مهمه ( اليورو يستخدم اكثر من عملتهم - روبيه - والدولار بعد بس استخدام اليورو اكثر )
معلومه .. ( الشعب مسالم جدا ومتساعد وهو خليط من اعرق هنديه وفرنسه وافريقيه ولغتهم الاكثر استخداما هي الفرنسيه بس وايدين يرمسون انجلش وما تحتاجون اصلا لانه المرشد يرمس انجلش ويفككم من الصدعه وللعلم عندهم لغه محليه خاصه فيهم وهي خليط من عدة لغات )
معلومه ( شي فالدكاكين مالتهم سوالف ميد ان يو ايه اي + ميد ان كي اس ايه وصلنا لهناك ) كله بصوب وشيبس اكس ال وعصير اريج بصوب وللعلم بعد ترا الخمور تنباع عندهم فالدكاكين حالهم حال اوروبا وامريكا والخ

نبدا على بركة الله .. واعذروني لاني بختصر الصور شوي لانه ما صورت وايد وثانيا هلكت وانا احمل الصور وباقي وايد ..

اول وصولنا لمطار ماهي الدولي ويبعد تقريبا 30 دقيقه ( 18 كيلو ) من المنتجع .. المطار صغير وعادي بس كيوت .. تحصلون هناك كم من مطعم ماله داعي .. والسوق الحره مالتهم عاديه جدا ..

ونوقف شوي مع الصور للوصول للمطار .. وترمون تشوفون مبنى المطار والهبوط من الطائره والسحب تعانق جبال وهضبات ماهي ( اكبر جزر سيشل ) .. وللعلم وصلنا على مطر وتقريبا لامطار عندهم يوميا ورشتها غير ( نفاف خفيف بس بكميه كبيره وايد والهمايل تبين من بعيد ويرجع يشد ويتحول لامطار متوسطه وقويه ورياح متوسطه الى شديده وعموما الجو عادي ودرجه الحراره 22- 27 في اغلب الاوقات )
​