طريقة عمل العيش البيتى , اسهل طريقة لعمل العيش فى البيت طريقة عمل العيش البيتى , اسهل طريقة لعمل العيش فى البيت سلامو عليكو يا حلوين منورين وربنا النهارده معانا حاجه حلوة وسهلة وهتوفرلنا كتير الصراحه وهى ايه قى العيش بدل مانروح نقف فى الطوابير فى الحر ده وفى الاخر منعرفش نجيب بردو المهم عشان مطولش عليكو تعالو نشوف بيتعمل ازاى المقادير: 2¾ كوب دقيق 2¼ ملعقة صغيرة خميرة جافة 1½ ملعقة كبيرة زيت زيتون 1¾ ملعقة صغيرة ملح كوب ميه دافئة الطريقة: 1- اخلطي كوب من الدقيق مع الخميرة والميه كويس واستني 15 دقيقة، وبعدين ضيفي عليهم زيت الزيتون والملح، واخلطيهم مع بعض لحد ما العجينة تتجانس، وبعد كده ضيفي عليهم باقي الدقيق، واستمرّي بالخلط لحد ما تكون العجينة ناعمة ومتماسكة. (ملحوظة: الكمية المستخدمة للدقيق بتكون عادة 2¾ كوب على مرحلتين، لكن تقدري تزوّدي أو تقللي على حسب ما تكون العجينة محتاجة). 2- ادهني العجينة بنسبة بسيطة من زيت الزيتون وغطّيها وسيبيها في مكان دافئ لمدة ساعتين لحد ما يتضاعف حجمها، وبعدين رشّي على العجينة نسبة بسيطة من الدقيق، واعمليها على شكل دائرة (زي البيتزا) وقسّميها لستة أجزاء. 3- خدي كل جزء واتنيه من فوق لتحت على شكل كرة، وبعد كده ادهني الكرات بنسبة بسيطة من زيت الزيتون، وغطّيهم بكيس بلاستيك، وسيبيهم على جنب لمدة 30 دقيقة. 4- خدي كرة ورشّي عليها دقيق وافرديها على شكل دائري (خدي بالك إن كل دائرة لازم تكون سميكة)، وبعدين سيبيها لمدة 5 دقائق (اتأكدي إن باقي كرات العجين تكون متغطية علشان ما تنشفش). 5- ادهني الطاسة بزيت الزيتون وحطّيها على النار دقيقة، وبعدين حطّي عليها العجينة لمدة 3 دقائق لكل ناحية (هتلاقي العيش بيمتلئ بالهواء)، وبعدين كرّري الخطوات دي مع باقي الكمية اللي عندك، وقدّميهم.. وبالهنا والشفا
رد: طريقة عمل العيش البيتى 2024 , اسهل طريقة لعمل العيش فى البيت تسلمي ع الموضوع دة استفدت جداااا بدل مااقف اجيب عيش دة اسهل مشكورة
رد: طريقة عمل العيش البيتى 2024 , اسهل طريقة لعمل العيش فى البيت بحب العيش البيتى جدااااااااااااااا الوصفة سهلة بس مش اى حد بيعرف يظبه ويطلع معاه حلو جربتها مرة بس مظبطتش
رد: طريقة عمل العيش البيتى 2024 , اسهل طريقة لعمل العيش فى البيت تسلم ايديك يا قمر سهل جدا وممكن كمان بدل المية نحط لبن صح وحتى نزود القيمه الغذائية تسلمى على تعبك
